LaTeX kap 台文

頂pái tī Ún-giân先生ê課報告ê時陣, 我用LaTeX做投影片, mā有人問tio̍h講beh àn-chóaⁿ來hō· LaTeX ē-tàng處理咱ê台文. 彼ê時陣我講了無甚清楚, tī這有機會ē-thang kah逐家討論台文tī LaTeX內底beh àn-chóaⁿ處理.

我想用LaTeX ê人可能真少, 伊是chi̍t-ê真強ê排版工具, mā一直sī專業科學論文ê排版標準. Tî-liáu論文, 伊mā ē-sái 做投影片, 樂譜… 真chē種物件. 但是LaTeX本體sī bô法度kā咱ê台文處理了kài好, 特別sī第八聲ê符號kap葫蘆點. Chit-má有新ê LaTeX系統, 叫做XeTeX, 伊ê-tàng處理UTF-8編碼ê文件, mā ē-tàng用TrueType kap OpenType字型. XeTeX出現了後, 咱ê台文tī LaTeX內底著ē-táng來處理ah.

Chit-má XeTeX tī Windows, Linux, kap MacOS X 攏ē-táng用. 一般逐家用Windows kah多, 我建議用TeX Live 2007, tī這ê-tàng chhōe著: http://www.tug.org/texlive/acquire.html
安裝mā sī真簡單, CD khǹg-lōe了後, 一步一步照伊ê指示去做著好. 裝好了後著已經有XeTeX ê系統ah.

Beh用XeTeX, 汝需要chi̍t-ê ē-thang處理UTF-8編碼ê Editor, 我sī用TeXMaker, 汝ē-tàng用汝慣習用ê.

汝若是beh寫全羅馬字ê文章, 真簡單, tī LaTeX ê Preamble所在打:
\usepackage{fontspec}

\usepackage{xltxtra}

\setmainfont[Mapping=tex-text]{Taigi Unicode}

setmainfont 命令後壁ê “Taigi Unicode” 是leh指定字型, 汝ē-tàng換做汝kah-ì ê字型, 譬如講 DejaVu Sans ah-sī 其他ē-tàng支援台文ê字型. 只要是tī Windows內底ê字型, XeTeX著ē-tàng chhōe著. ài ē記得, 汝若是koh另外安裝新ê字型, 請koh執行chi̍t-pái “fc-cache -f -v” 命令, hō· XeTeX chhōe ē著新ê字型.

Tī內文ê所在, 用ē-thang 打出Unicode ê輸入法來打著好, kap一般ê LaTeX文件共款. 歸ê lóng打好了後, 請用 “xelatex” 命令代替 “latex” 命令來編譯. 伊直接出來ê著是PDF檔案ah, m̄-sī一般ê DVI檔案.

汝若是beh打漢羅ê文章sī sió-khóa khah麻煩, 因為XeTeX chit-má iáu無法度處理混合字型.
若是汝ê文章是羅馬字khah多, 漢字khah少, ē-tàng kah主字型設做羅馬字字型, 另外koh設定chi̍t-ê漢字字型. 像án-ne:
\usepackage{fontspec}
\usepackage{xltxtra}
\setmainfont[Mapping=tex-text]{Taigi Unicode}
\newfontfamily\han[BoldFont=標楷體,Mapping=tex-text]{新細明體}

Tī內文ê所在, 阮若是beh打 “Góa sī 台灣人” 即句話, lo ài打做:
Góa sī {\han 台灣人}

ài用字型命令kah XeTeX講beh換漢字ê字型, án-ne chiah bē hō· XeTeX chhōe無字型, soah hō·漢字走未出來.

汝若是漢字khah多mā是共款, kah主字型設做漢字字型, 像án-ne:
\usepackage{fontspec}
\usepackage{xltxtra}
\setmainfont[BoldFont=標楷體,Mapping=tex-text]{新細明體}
\newfontfamily\tai[Mapping=tex-text]{Taigi Unicode}

Tī內文ê所在, tú著羅馬字ê時陣, 著ài用 \tai 字型命令kah羅馬字包起來.

漢羅文章ê編譯方式kap進前所講ê全羅文章共款.

用這款方法，著ē-tàng tī LaTeX內底排版出súi-súi ê台文ah. 若是有beh投台文ê期刊, mā ē-tàng用LaTeX試看māi, 我ê感覺是LaTeX排了比Word khah好.

若是有人有別種ê方式ē-tàng tī LaTeX處理台文, 歡迎同齊做夥來討論.